Faktori ndërkombëtar duke filluar me; Presidentin e Partive Popullore Evropiane, Joseph Daul, zëvendëspresidenti i PPE-së, Davia McAllister dhe eurodeputeti Knut Fleckenstein i kanë kërkuar kryetarit të Partisë Demokratike, Lulzim Basha prej kohësh që të futet në parlament dhe së fundmi këmbëngulin që të marrin pjesë në zgjedhje.
Jo më larg se sot eurodeputeti Fleckenstein kërkoi që Basha të futet në zgjedhje dhe tregoi se është shumë i shqetësuar.
Më herët të gjithë eurodeputetët kanë thënë se për BE-në është e pa pranueshme bojkoti i parlamentit dhe mospjesëmarrja në zgjedhje.
Deri më tani Partia demokratike dhe aleatët e saj nuk kanë dëgjuar thirrjet e tyre. Gjithashtu PD nuk ka pranuar as ofertat përpjekjet e ndërkombëtarëve për t`i ulur në një tavolinë pozitën dhe opozitën për të arritur një marrëveshje për tu futur në zgjedhje.
Ka qenë vetë kreu i PD-së që nuk ka pranuar të marrë pjesë në këto zgjedhje dhe s`ka pranuar asnjë ofertë që ka ardhur nga ndërkombëtarët dhe nga opozita shqiptare.
Parlamenti Evropian ka folur qartë: “Janë jashtë Evropës ata që bojkotojnë parlamentin dhe zgjedhjet”. Deri më sot të gjitha veprimet e kryetarit të Partisë demokratike, Lulzim Basha kanë qenë kundra udhëzimeve të BE-së në postimin e tij në rrjetin social Facebook ai thotë se ndjehet evropian.
Basha shkruan: “Sot është 9 maji, Dita e Evropës, dita e lirisë, dita e fitores së të mirës mbi të keqen, të vërtetës mbi gënjeshtrën, të së drejtës mbi krimin. Kjo është ditë e shënuar për Europën, është ditë e shënuar për shqiptarët.
Sot unë ndihem i nderuar që jam pjesë e bashkimit më të madh qytetar për zgjedhje të lira e të ndershme, bashkimit më të madh pro-evropian e pro-amerikan që ka njohur Shqipëria dhe Ballkani. Ne jemi lëvizja pro-evropiane e Shqipërisë!”.
Gjithashtu, amerikanët sot treguan se janë kundra bojkotit të Bashës. Senatori John McCain është i shqetësuar se çfarë po ndodh këtu, ndaj i ka bërë apel PD-së që të futet në zgjedhje.
SHBA-të insistojnë akoma që opozita të marrë pjesë në zgjedhje sepse javën që vjen në Tiranë pritet të mbërrijë zv/ndihmës sekretari amerikan i Shtetit, Hoyt Brian Yee.
Mësohet se zëvendës ndihmës sekretarit i shtetit do te takoje kryeministrin Rama, presidentin e zgjedhur Ilir Meta dhe kreun e PD Lulzim Basha.
