Duket se Partia Demokratike nuk është aspak e kënaqur me emrat e qeverisë së re. Fillimisht reaguan Tritan Shehu dhe Edi Paloka, ndërsa nuk ka vonuar as reagimi i Lulzim Bashës.
Ky i fundit shkruan në një postim në Facebook se qeveria e re është thellim i së keqes, korrupsionit dhe krimit.
Basha thotë se kjo është qeveria e konsolidimit të rikthimit në pushtet të elitës komuniste, teksa përmend emra si Rama, Ruçi, Xhafaj, Bushati e Qato.
POSTIMI I BASHËS:
Asgjë e re, vazhdim dhe thellim i së keqes. Kjo është qeveria e thellimit të korrupsionit dhe të krimit. Jo vetëm Edi Rama, por edhe Fatmir Xhafa, Arben Ahmetaj, Damian Gjiknuri e pothuajse të gjithë ministrat e tjerë janë garancia e provuar për korrupsionin dhe krimin.
Kjo është qeveria e konsolidimit të rikthimit në pushtet të elitës komuniste. Tridhjetë vjet pas rënies së komunizmit, Shqipëria sot drejtohet nga disa nga figurat famëkeqe komuniste ose pinjollët e tyre nga Edi Rama tek Gramoz Ruçi, Fatmir Xhafaj, Bushati e Qato e qindra të tjerë në poste kyçe qeverisëse.
Kjo është qeveria e thellimit të sundimit privat të Edi Ramës dhe një grushti njerëzish. Kush mendoi se “takimet me popullin” dhe ballafaqimi me hallet e rënduara të njerëzve e bënë Edi Ramën të reflektojë, sot kuptoi që kjo qeveri nuk do jetë kurrë qeveria e popullit dhe nuk do punojë kurrë për popullin.
Opozita ka detyrën dhe përgjegjësinë që bashkë me qytetarët të mos lejojë të shkojë deri në fund ky projekt i zi për vendin tonë.
