Kryeministri Edi Rama ndodhet në Bruksel, ku do të mbajë një sërë takimesh me zyrtarë të lartë. Por, jo vetëm Rama do të jetë i pranishëm atje. Edhe kryedemokrati Basha ka udhëtrau sot drejt Brukselit ku do të marrë pjesë në takimin e Asamblesë Politike të Partisë Popullore Europiane, takim ku marrin pjesë përfaqësues të partive të djathta europiane, të qeverive të vendeve evropiane dhe të institucioneve të Bashkimit Europian.
Në një njoftim të Selisë Blu, thuhet se Basha do të ketë takime të veçanta me përfaqësues të lartë të politikës evropiane, për të diskutuar për situatën politike dhe ekonomike të Shqipërisë dhe veçanërisht rreth sfidave të integrimit të vendit në Bashkimin Europian.
Edhe Kryeministri Edi Rama ka udhëtuar këtë të hënë drejt Brukselit, ku do të takojë liderët e Bashkimit Europian, në një përpjekje të re për t’i dhënë shtysë hapjes së negociatave të Shqipërisë për anëtarësim në Union.
