Kryetari i Partisë Demokratike, Lulzim Basha deklaroi sot se shkarkimi i Besim Hajdarmatajt u bë për të shpëtuar Saimir Tahirin. Në një deklaratë nga selia blu, kryedemorati listoi të gjitha ngjarjet e ditëve të fundit që kanë ndikuar në shkarkimin e Hajdarmatajt. Basha tha se ‘kamikazja’ e Ramës shkarkoi kryeprokurorin e Krimeve të Rënda, Besim Hajdarmataj.
Kreu i PD-së deklaroi sot se ky është një vendim në shkelje të plotë me ligjin sepse Arta Marku nuk i ka kompetencat për të shkarkuar kreun e Prokurorisë së krimeve të rënda.
“Ishte bërë marrëveshje me Ramën. Edi Rama do i siguronte Tahirit paprekshmërinë nga drejtësia. Rama shpalli urdhrin ndaj Prokurorisë kur tha se nuk ka prova për të dënuar Saimir Tahiriin. Sot kamikazia e Edi Ramës në Prokurorinë e Përgjithshme kërkoi shkarkimin e kreut të Prokurorisë së Krimeve të Rënda. Ky shkarkim vjen pak ditë pas informacioneve që erdhën nga Greqia dhe Italia. Vjen një ditë pasi Hajdarmataj mori në pyetjen e Saimir Tahirit. Vjen në të njëjtën ditë kur opozita denoncoi lidhjet e vëllait të Fatmir Xhafajt më trafikun e drogës” deklaroi Basha.
