Kryedemokrati Basha, ka çelur mbledhjen e Këshillit Kombëtar të Partisë Demokratike, për zgjedhjen e drejtuesve të rinj të saj. Basha ka folur për sfidat me të cilat do të duhet të përballet forca kryesore e opozitës. Ai edhe një herë i është rikthyer akuzave, duke përçuar mesazhin se ajo çfarë i duhet vendit është shkëputja e politikës nga një grusht politikanësh grabitqarë.
“Roli ynë i demokratëve në këtë moment është kritik. Detyra jonë është historike. Një partie politike nuk i kërkohet thjesht të ndalë një të keqe. Nga ne kërkohet një ndryshim transformues, edhe më i vështirë se ai i viteve ’90.
Atëherë kishte energji, shpresë, kurse sot shqiptarët e shohin politikën si shkaktarin e problemeve të tyre dhe kanë humbur besimin. Ndaj ne duhet të fitojmë luftën për besim, besim se Shqipëria mund të bëhet një vend normal.
E vetmja gjë është shkëputja e politikës nga një grusht politikanësh grabitqarë. Vënia e politikës në shërbim të njerëzve, të jetë mirëqënia e njerëzve, jo t’i trajtosh si injorantë që duhen gënjyer, jo t’i përçmosh dhe të izolohesh në zyra luksoze”, tha ai.
