Kreu i Partisë Demokratike ka akuzuar drejtpërdrejt kryeministrin Rama për arrestimet dhe procedimet e mbështetësve të PD-së, duke e cilësuar një reprezalje politike, e cila po ndihmohet nga kryeprokurorja Arta Marku dhe ministri Sandër Lleshaj.
Gjatë deklaratës urgjente për shtyp, Basha u bëri thirrje policëve dhe prokurorëve që të mos u binden urdhrave politikë të Ramës, ndërsa shtoi se shqiptarët nuk ka asgjë që i ndal për largimin e kryeministrit.
“Reprezaljet e fundit politike të Ramës kanë për qëllim që të tërheqin qytetarët kundër regjimit kriminel. Ky është plani i një njeriu në panik total të humbjes së pushtetit”, tha ndër të tjera Basha.
Deklarata e kryedemokratit:
Policia ka arrestuar anëtarët e PD-së në Përrenjas dhe Elbasan, në pranga kanë rënë Bujar Vreko, Arjan Karriqi, Leonard Ozuni dhe Aurel Bylykbashi.
Këto veprime janë reprezalje të hapura politike ndaj qytetarëve që protestojnë kundër regjimit të Ramës. Mbi 50 simpatizantë të PD-së mbahen në burgje. Qindra qytetarë kanë protestuar kundër qeverisë dhe aferave të tmerrshme nga Kukësi në Shkozë dhe kudo në Shqipëri janë ndaluar, keqtrajtuat, rrahur dhe abuzuar në mënyrë të paligjshme., ky është bilanc regjimesh agresive.
Sistemi i drejtësisë është shpartalluar, parlamenti është shpartalluar. Tashmë nuk ka më asnjë iluzion, Rama ka vendosur në Shqipëri një pushtet autokratik, pasi vuri në kontroll të gjitha pushtetet, tani po i përdor ato si vegla.
Reprezaljet e fundit politike të Ramës kanë për qëllim që të tërheqin qytetarët kundër regjimit kriminel. Ky është plani i një njeriu në panik total të humbjes së pushtetit.
Rama ndihmohet nga Sandër Lleshi dhe Arta Marku. Ju bëj thirrje policëve dhe prokurorëve që e ndjejnë veten njerëz të ligjit, të mos u binden urdhrave politikë të Ramës. Asgjë dhe askush nuk e ndal betejën tonë për Shqipërinë si gjithë Evropa. Asnjë hap pas për triumfin e demokracisë.
