Kryetari i Partisë Demokratike, Lulzim Basha ka akuzuar kryeministrin Rama se po pastron paratë e krimit dhe drogës me anë të koncesioneve.
Duke iu përgjigjur deklaratës së Ramës të bërë sot, Basha tha se Rama i fton shqiptarët të qeshin me të vërtetat e tmerrshme, ndërsa shtoi se projekti 1.4 miliard euro duhet të ndalet tani, teksa hedh dyshime se po përdoret për të pastruar para.
Po ashtu, në mbyllje, kryedemokrati i bën thirrje Prokurorisë dhe partnerëve ndërkombëtarë që të hetojnë koncesionin e tenderit qeveritar.
FJALA E BASHËS:
Në mars 2017, Departamenti Amerikan i Shtetit e vendosi Shqipërinë në listën e zezë të vendeve kryesore të pastrimit të parave në botë, e quajtur zyrtarisht Lista e Vendeve Kryesore të Pastrimit të Parave. Është hera e parë që Shqipëria është përfshirë në këtë listë që përditësohet çdo vit. E gjeni në faqen 8 të raportit për Strategjinë e Kontrollit Ndërkombëtar të Narkotikëve që Departamenti i Shtetit i dërgoi zyrtarisht Kongresit Amerikan.
Qeveria amerikane harton listën, vend kryesor i pastrimit të parave . Në gusht 2017, një tjetër raportim për pastrimin e parave,m e renditi Shqipërinë si një ndër 3 vendet kryesore të pastrimit të parave në Evropë.
Janë me qindra milionë euro të prodhuara nga droga në duar të kriminelëve, që duan ti qarkullojnë dhe pastrojnë këto para. Nuk ka dyshim që është rezultat i parasë që vjen nga droga. Nuk ka dyshim që koncesionet që jep Edi Rama mund të jenë skema të pastrimit të parave të drogës.
Ka një parim themelor ekonomik: Paraja e pistë përzë paranë e ndershme. Për 4 vite nuk ka asnjë investim të huaj. Droga dhe trafiqet po lulëzojnë, paraja e pistë. Paratë nuk i pastrojnë vetëm kriminelët, por edhe politikanët që marrin para nga kriminelët.
Rama sot i ftoi shqiptarët që të mos i marrin seriozisht akuzat e kapjes së Shqipërisë nga paratë e pista.
Për katër vjet me rradhë ai u kërkoi shqiptarëve të qeshnin me akuzat se në Shqipëri mbillej kanabis dhe trafikohej drogë. Edi Rama u tha shqiptarëve të qeshnin se opozita ngatërronte mushkonjat me avionët. Edi Rama u tha shqiptarëve të qeshnin me opozitën që e thërrisnin Elvisin, Evis. Edi Rama ulej me fshatarët dhe i pyeste me shaka c’thotë kanabisi. Edi Rama u tha shqiptarëve që të qeshnin me akuzat e opozitës se Saimir Tahiri ishte trafikant.
Ulej me fshatarët dhe i pyeste se ç’thotë kanabisi, herën e fundit që Rama i ftoi shqiptarët të qeshnin.
Herën e fundit që dëgjuam Ramën kur na tha të qeshnim Shqipëria u kthye në hambar droge dhe zonë të lirë të krimit. Tani po na fton përsëri të qeshim. Në fakt është koha të shqetësohemi dhe t’i themi ndal Edi Ramës dhe krimit në politikë dhe në ekonomi.
Depërtimi i krimit në ekonomi duhet ndalur tani. Projekti 1 miliardë euro duhet ndalur tani. Çdo koncesion, çdo investim që përfshin qeverinë duhet të bëhet transparent në çdo detaj. Prokuroria e ndihmuar nga partnerët ndërkombëtarë duhet të hetojë pastrimin e parave dhe krimin e lidhur me të./ Tirana Today
