Gjatë takimit të radhës elektoral, nga qyteti i Beratit, kreu i Partisë Demokratike, Lulzim Basha, theksoi se Rama dhe Meta do të ndëshkohen me votë më 25 qershor. Ndërsa vuri në dukje se ai nuk ka ndërmend të bëjë koalicion me ta pas zgjedhjeve parlamentare, pavarësisht faktit se Basha dhe Rama kanë lënë të kuptohet mundësinë e një bashkëqeverisje midis tyre.
“Më 25 qershor do t’u japim bërrylin se grushtet i kanë ngrënë. Unë nuk ju tradhtoj kurrë. Kjo është lëvizje e qytetarëve. Le të dalim masivisht. Kjo betejë nuk bëhet as për të bërë pazar me Edi Ramën dhe Ilir Metën, kjo është për qytetarët shqiptarë. Kam vite që e prek dhimbjen tuaj dhe e ndjeva thirrjen tuaj, dhe korrëm fitoren e parë bashkë, dhe bashkë do të korrim fitoren e madhe. Jam gati t’ju udhëheq drejt këtij stacioni dhe drejt fitores. Gati jam unë dhe gati jeni edhe ju që t’i shkojmë deri në fund kësaj beteje. Gati është e gjithë Shqipëria. Më 25 qershor merreni fatin tuaj në dorë dhe votoni numrin 6 për një ekonomi të fortë dhe të nesërme të sigurt”, u shpreh Basha.
