Nga selia e PD, kryedemokrati Basha tha para mbështetësve se regjimi i kryeministrit Rama ka marrë fund. Në 16 mars, ai ftoi të gjithë qytetarët për një protestë vendimtare, për të çliruar zgjedhjet, ekonominë por edhe PS.
“Mirësevini në shtëpinë e lirisë! Sot në të 4-tën protestë radhazi, populli i bashkuar ka përfunduar etapën e fundit të shkrirjes së këtij Parlamenti të krimit dhe hedhjes në kazanin e plehrave.
Dita e sotme ka meritën e ndezjes së shpresës për ditët që po vijnë.
Sot e kemi dërguar njëherë e mirë në shtëpi Parlamentin e krimit. Kemi hapur shtegun e vetëm që do të kalojë vota e çdo shqiptari.
Zgjidhja është largimi një orë e më parë i shkaktarit kryesor, kryezullumqarit Edi Rama.
Ikja e tij është fundi i pjesës së parë të kësaj beteje, që do të vazhdojë me bashkimin më të madh në këto 3 dekada.
Edhe miqtë e ngushtë, ata që janë përpjekur ta mbrojnë e dinë shumë mirë se Edi Rama ka mbaruar, regjimi i tij ka marrë fund”, tha ndër të tjera kreu i PD-së Lulzim Basha.
