Komisioni i Ankesave dhe Sanksioneve në Komisionin Qendror të Zgjedhjeve ka rrëzuar kërkesat e Lëvizjes Socialiste për Integrim, dhe koalicionit Partia Demokratike-Aleanca për Ndryshim për marrjen r provave nga institucionet, në lidhje me procesin zgjedhor të 25 prillit.
Lidhur me këtë vendim, ka reaguar Sekretari i Përgjithshëm i PD, Gazment Bardhi, i cili u shpreh se KAS u mohoi sot shqiptarëve transparencën për masakrën zgjedhore.
Sipas tij, 3 anëtarët e zgjedhur nga PS refuzuan të marrin nga institucionet shtetërore provat që faktojnë se mazhoranca përdori burimet shtetërore dhe kriminale për deformimin e vullnetit të zgjedhësve.
Reagimi i Bardhit në rrjetin social, Facebook
Komisioni i Ankesave dhe Sanksioneve në KQZ u mohoi sot shqiptarëve transparencën për masakrën zgjedhore të 25 Prillit. 3 anëtarët e zgjedhur nga PS refuzuan, në mënyrë të paligjshme, pa asnjë argument të marrin nga institucionet shtetërore provat që faktojnë se PS përdori burimet shtetërore dhe kriminale për deformimin e vullnetit të zgjedhësve.
Duke refuzuar të marrë dhe administrojë informacionin zyrtar për punësimet masive të paligjshme, përdorimin e personave me rekorde kriminale për blerjen e votave, dhënien e paligjshme të lejeve të legalizimit apo favoreve të tjera shtetërore në këmbim të votave, KAS bëhet palë me pushtetin për blerjen e zgjedhjeve.
Ky është një akt i përsëritur, kur shërbëtorët e Ramës u heqin shqiptarëve të drejtën për një proces të ndershëm zgjedhor. Me vendimin për fletën e ndërlikuar të votimit, për shkak të të cilit vota e 83 mijë qytetarëve u bë e pavlefshme, KAS faktohet si bashkëautor i masakrës elektorale të 25 Prillit.
Edi Rama mund ta pengojë tani, por nuk ka forcë ta ndalojë transparencën për masakrën zgjedhore. Transparenca dhe drejtësia për 25 Prillin do të bëhet e plotë, do apo nuk do Rama dhe veglat e tij në KAS.
