Gjykata e Shkodrës ka vendosur masën e sigurisë “arrest shtëpie” për ish-deputetin e PD-së, Bardh Spahia. Ky i fundit u arrestua dy ditë më parë në Tiranë, pas përplasjeve që ndodhën në KZAZ-në e Shkodrës. Gjatë seancës, Spahia ka deklaruar se arrestimi i tij vjen si pasojë e një prapavije politike.
Në Shkodër kanë mbërritur disa ish-deputetë të PD-së për të pritur vendimin për Spahiajn.
“Gjyq politik që Rama dhe banda në pushtet i bënë Aleancës për Mbrojtjen e Demokracisë. Spahia ishte aty vetëm për të qetësuar situatën. Policë bashkiakë janë lënë në burg, të cilët ishin aty për të mbrojtur dekretin e Presidentit të Republikës. Asgjë nuk ka ndal, asgjë nuk na shkel në rrugën tonë për të mbrojtur Kushtetutën. Data 30 nuk është datë zgjedhjesh sepse është antikushtetuese”, tha Flamur Noka për mediat, pasi u njohën me vendimin e gjykatës së Shkodrës.
