Edhe pse ndodhet në një nga shtetet më të prekura nga koronavirusi në Evropë, Barcelona ka rihapur sot plazhet e saj.
Por sipas këshilltarit bashkiak të qytetit, Eloi Badia, rihapja e plazheve është vetëm për ata që praktikojnë një sport.
“Janë hapur për të ushtruar një sport individual. Ju nuk mund të shkoni atje për të shëtitur, për t’u ulur, shtrirë ose për piknik”, tha ai.
Veç kësaj, plazhet do të mund të frekuentohen vetëm midis orës 6:00-10:00 të mëngjesit. Kujtojmë se qytetet e tjera si San Sebastian (veri) dhe Valencia (në lindje) tashmë i kanë rihapur me kohë plazhet e tyre për sport.
Me më shumë se 260 mijë raste dhe mbi 26 mijë viktima, Spanja renditet si një nga vendet më të prekura nga pandemia e koronavirusit.
Spanja po vijon zbatimin e planit me katër faza, për hapjen e saj graduale që do të vazhdojë deri në fund të qershorit.
