Barcelona është ndalur për herë të parë këtë sezon dhe atë e ka bërë Girona. Një rezultat surprizë 2-2 mbrëmjen e sotme në “Camp Nou”, kur mendohej se katalanasit do ta kishin mjaft të lehtë. Ishte një ndeshje e veçantë për Lionel Messin, pasi është bërë lojtari i huaj me më shumë ndeshje të luajtura në La Liga, me 423 paraqitje. Ai ka lënë mbrapa ish-shokun e tij të skuadrës, brazilianin Dani Alves, i cili është ndalur në 422 ndeshje.
Ishte pikërisht Messi që zhbllokoi ndeshjen në minutën e 19’, pas një asistimi mjaft të mirë nga ana e Vidal. Problemet për katalanasit kanë filluar në minutën e 35-të pas kartonit të kuq të marrë nga qendërmbrojtësi Lenglet, i cili ka goditur më bërryl kundërshtarin. Girona ka përfituar nga superioriteti numerik dhe ka realizuar golin e barazimit në minutën e 45-të me anë të Stuanit. I njëjti lojtarë shënon sërish në minutën e 51’ në portën e Barcelonës për të përmbysur rezultatin.
Pavarësisht inferioritetit numerik, Barça është vënë në kërkim të golit të barazimit, duke e arritur atë falë një goditje me kokë të Gerard Pique në minutën e 63-të. Sulmet e vendasve kanë qenë të vazhdueshëm, por tentativat e tyre nuk kanë qenë të suksesshme.
Pika e marrë sot e ka ndihmuar Barcelona-n të ruajë kryesimin në renditje vetëm falë diferencës së golave, duke parë se Real Madrid, që mban vendin e dytë, ka të njëjtin numër pikësh: 13. Girona, ndërkohë, është ngjitur në vendin e gjashtë të klasifikimit dhe ka tetë pikë pas 5 javëve të para.
