Skuadra e bardhebluve ka humbur 40 milionë lekë të vjetra premio, që do shpërndahej nëse ata do të fitonin në derbin kryeqytetas.
Presidenti Refik Halili mësohet t’u ketë thënë lojtarëve një ditë para sfidës:
“Fitoni me Partizanin dhe keni në dispozicion 40 milionë lekë të vjetër premio. Do ta shpërndajmë menjëherë pas ndeshjes”.
Burime të sigurta të Panorama Sport në klub thonë se vendimi për këtë superpremio ishte marrë prej ditësh, por për t’i karikuar edhe më tepër lojtarët, kreu i bardhebluve mendoi t’u tregonte shifrën vetëm 24 orë para ndeshjes.
Megjithatë, pavarësisht lojës së mirë kundër Partizanit, sërish 24 herë kampionët e vendit nuk ia dolën të fitojnë ndaj rivalit të përjetshëm. 16 ndeshje radhazi pa një fitore janë shumë për një klub si Tirana, që po vuan gjithnjë e më tepër mungesën e suksesit në derbi. Ndërkohë, edhe pse nuk fituan, mësohet se lojtarët bardheblu do të kenë një shpërblim për barazimin. Ende nuk dihet shifra, por natyrisht nuk pritet të jetë më tepër se 10 milionë lekë në total.
