Përballja në Olimpico mes Romës dhe Interit është mbyllur në barazim 2-2, një barazim i hidhur që nuk ndihmon asnjërën nga skuadrat. Zikaltërit kaluan dy herë në avantazh, por romanët u rikthyen në të dy rastet.
Vetëm në minutën e 37’-të do vinte goli i Keita Balde, i cili shtyu në rrjetë një pasim nga D’Ambrosio. Me avantazhin e Inter u mbyllën 45 minutat e para.
Në fraksionin e dytë është Roma që barazon shumë shpejt me një “silurë” të Cengiz Under nga jashtë zone që la të palëvizur Handanovic. Gjithsesi baraspesha nuk zgjat shumë sepse Icardi shënon golin e avantazhit për herë të dytë për zikaltrit pas një harkimi nga goditja këndore. Me këtë gol sulmuesi ngjitet në kuotën e 8 të tillëve dhe hyn në garë me Piatek, Ronaldo e Immobile për “Këpucën e Artë”.
Gjithsesi kjo nuk është mbrëmja e duhur për skuadrën e Spallettit pasi Brozovic prek me dorë në zonë një top të devijuar nga Skriniar. Pas konsultimit me VAR arbitri akordon penallti që kthehet në gol nga Kolarov.
Një pikë që nuk i vlen asnjërës skuadër pasi Inter shkon në kuotën e 29 pikëve, 11 larg Juventus, me të cilët ndeshet javën e ardhshme në Torino. Ndërsa Roma ngjitet në vend të 7-të me 20 pikë.
