Banorët e Unazës së Re kanë dalë sërish në protestën, duke numëruar kështu plot 41 ditë që kërkojnë të mos u prishen shtëpitë e tyre.
Të vendosur pranë mbikalimit, banorët kanë bllokuar qarkullimin e mjeteve në të dyja akset e rrugës. Sonte, ata kanë akuzuar se po tentohet t’i përçajnë duke u bërë oferta të ndryshme.
Pyetjes së gazetarëve nga terreni, kush po tenton t’iu përçajë, protestuesi i cili hodhi akuzat u përgjigj: “Po kush tjetër përveç zagarëve të Afrim Qendros dhe Erjon Velisë, me arrestime presione, pseudo-oferta”.
Banorët kërkuan edhe lirimin e Daniel Dobrajt dhe Dorjan Protoduarit, të cilët janë ende në qeli, që pas protestës të dhunshme, të zhvilluar para Kuvendit.
Pas thirrjes së studentëve për t’iu bashkuar të gjithë qytetarët në një protestë kombëtare, banorët e Astirit thanë se do i bashkohen protestës së studentëve.
“E duam Shqipërinë pa Edi Ramën, sepse ai është një kriminel, hajdut dhe mashtrues. Jemi me studentët, studentët janë bijtë tanë. Nesër në orën 9 të gjithë bashkuar, të gjithë të bashkuar jemi të fituar”, tha një nga banorët gjatë protestës.
