Banorët e zonës së Astirit në Tiranë kanë dalë sërish sot në protestë, duke kundërshtuar prishjen e shtëpive të tyre.
Banesat e tyre por edhe bizneset do të prishen në kuadër të projektit të Unazës së Re. Banorët kanë bllokuar rrugën kryesore, duke u ulur këmbëkryq, ndërsa bëjnë thirrje që të mos nxirren në mes të katër rrugëve.
Duam shtëpitë tona. Poshtë qeveria, poshtë hajdutët”, thërrasin ata njëzëri. Shumë prej tyre janë të vendosur që të mos e lejojnë prishjen e shtëpive të tyre, edhe nëse do u duhet të vetëflijohen.
“Kur të na vrasin neve, atëherë le të bëjnë atë që kanë nisur. Do bëhemi lugetër edhe do i mbysim. Qeveria po tallet me ne. Nuk tërhiqemi”, shprehen qytetarët.
“Nuk e lë pronën, tanku sipër të më kalojë”, shprehet një tjetër banore.
“Ne shajmë Lulzim Bashën, por nuk dalim për shtëpitë tona në protestë. As serbi s’na ka bërë ne këtë që po na e bën qeveria. Ne nuk çohemi me mbrojt shtëpitë tona. Protesta e ka zhvillu këtë njerëzim, këtë botë. Këtu ka vdek shpresa, prandaj të gjithë po largohen. Rrethrrotullimi te Casa Italia është 70 metra, te Kristali 70 metra. Po mbet 1 milion njerëz Shqipëria, e la shkret këtë vend! Çdonjëri është dakord me zgjerimin e Unazës së Re. Tani inxhinierët janë ul dhe kanë bërë plan për një projekt sa më të madh. Për dëbimin e njerëzve, vijnë ata të UNUK-ut, peshkaqenët e tyre dhe vjedhin lekë. Jam nga Tropoja, kam ardh nga emigrimi, e gjeta nënë duke qajt. E gjetëm vendin me therra, po e bëjmë Florida, e kemi bërë me gjakun tonë”, ka thënë një tjetër qytetar i revoltuar.
Banorët e kundërshtojnë projektin, pasi sipas tyre është zgjeruar përtej përmasave të projektit fillestar.
