Shumë pallate janë shkatërruar në lagjen nr.17 në Durrës pas tërmetit të 26 nëntorit. Të frikësuar, banorët janë larguar nga banesat e tyre për t’u akomoduar në ambiente që shfaqen më të sigurt.
Shumë prej tyre janë në pritje të një eksperti për verifikuar e konstatuar nëse apartamentet e tyre janë të banueshme.
“Gjendja brenda është katastrofë. Nuk ka mur që nuk është plasaritur. Ka 50 hyrje, aktualisht nuk ka asnjë banor, të gjithë po ngrenë rrobat dhe kanë ikur, dikush fle nëpër makina etj. Këtu është pasuria jonë. Deri në këtë minutë askush nga shteti nuk ka shkelur, nga shkallët deri këtu”, tha një banor për “BË”.
Ndërsa një tjetër u shpreh se ka mbetur rrugëve bashkë me 5 fëmijët e tij. “Askush nuk është interesuar. Jemi jashtë. Jam me 5 fëmijë dhe kemi mbetur rrugëve. A ka shtet a nuk ka. Kemi mbetur pa bukë.”
