Partia Demokratike, me anë të deputetes Valentina Duka, ka vijuar serinë e denoncimeve në adresë të kreut të Bashkisë së Durrësit, Vangjush Dako. Ajo ka thënë se Dako është fshehur nga opinioni publik, me shpresën se krimi i tij elektoral do të harrohet.
Në prononcimin për mediat, deputetja demokrate kujtoi faktin se përgjimet në dosjen 339 janë me qindra, dhe se ato që kanë dalë deri tani, janë vetëm fillimi. Në morinë e akuzave të trumbetura prej kohësh, deputetja tha se Dako është emblema e kësaj qeverie të dalë nga votat e blera të shqiptarëve të varfër.
Ndodhur në këto kushte, sipas saj, Dako e ka vendin në qeli, si shembulli i parë i ndëshkimit të krimit elektoral.
Deklarata e plotë
“Vangjush Dako është fshehur nga opinioni publik, me shpresën se duke mos u shfaqur para qytetarëve, duke heshtur dhe duke mos dhënë llogari, krimi i tij elektoral do të harrohet.
Vangjush Dako i ka bërë llogaritë gabim!
As fshehja, as heshtja, as pazaret e tij okulte që ai bën me Edi Ramën dhe prokurorinë, nuk mund të prishin provat e krimit të tij, blerjes së votave me bandat.
Përgjimet në dosjen 339 janë me qindra. Ato që kanë dalë deri tani, janë vetëm fillimi.
Përgjimet në dosjen 339 nxjerrin zbuluar bashkëpunimin e Vangjush Dakos me bandën e Avdylajve, për të vjedhur votat në Qarkun e Durrësit, në këmbim të favoreve në Bashkinë e Durrësit dhe deri në Kryeministri.
Biseda e shkurtit 2017 me Altin Avdylajn, me nofkën Niçja, të cilit i premton favore, e provon këtë. Biseda e Dakos me Niçen për të falenderuar kreun e bandës, Astrit Avdylaj, dy ditë pas zgjedhjeve e provon këtë.
Telefonatat e bandës drejtuar Dakos, kur rrethohet nga forcat e FNSH-së e provon këtë.
Në dosjen 339 provohet skema që Edi Rama ndoqi në Durrës, Dibër, Lezhë, Shkodër, Elbasan e në të gjithë Shqipërinë, për të bashkëpunuar me bandat lokale të krimit të organizuar, sipas pazarit “vota në këmbim të tenderave dhe mosndëshkimit prej policisë”.
Vangjush Dako është emblema e kësaj qeverie të dalë nga votat e blera të shqiptarëve të varfër, prandaj ai e ka vendin prapa hekurave, si shembulli i parë i ndëshkimit të krimit elektoral.
Pa ndëshkimin e modelit që blen vota dhe kërcënon zgjedhësit, duke instaluar një pushtet ilegjitim kundër interesit të qytetarëve, në Shqipëri nuk ka për të patur as stabilitet, as normalitet demokratik”, përfundoi ajo.
