Presidentja e Kroacisë, Kolinda Grabar-Kitaroviç, e partisë konservatore Bashkimi Demokratik Kroat (HDZ) dhe ish-kryeministri Zoran Milanoviç i Partisë Social Demokratike (SDP) të dielën garojnë në balotazhin e zgjedhjeve presidenciale.
Në raundin e parë të zgjedhjeve dy javë më parë, Milanoviç fitoi ndaj 11 kandidatëve të tjerë, duke marrë 29.6 për qind të votave.
Ai doli para presidentes në detyrë, Kolinda Grabar-Kitaroviç, cila mori 26.7 për qind të votave.
Roli i presidentit është kryesisht ceremonial në Kroaci.
Presidenti nuk mund t’i vë veton ligjeve, por është komandant i ushtrisë dhe përfaqëson vendin në arenën ndërkombëtare.
Sondazhet tregojnë se rezultati do të jetë i ngushtë, megjithëse disa prej tyre i japin një epërsi të vogël presidentes Grabar-Kitaroviç.
Kroacia, e cila mori presidencën e radhës të Bashkimit Evropian më 1 janar 2020, do të mbajë zgjedhjet e ardhshme parlamentare në vjeshtë, shkruan “Voa”.
Votimet përfundojnë në orën 19:00 dhe rezultatet e para paraprake pritet të shpallen një orë më vonë, në orën 20:00.
Milanoviç, i cili ishte kryeministër i vendit nga viti 2011 deri në vitin 2015, zhvilloi fushatën e tij zgjedhore me premtimin se ai do të luftonte korrupsionin që ai thotë se ishte intensifikuar që kur ai humbi pushtetin dhe konservatorët morën drejtimin e vendit.
