Kreu i grupit parlamentar socialist, Taulant Balla, duke folur për ligjin për pronësinë e tokës, i kërkoi Peleshit hartimin e një ligji të ri për të riparë të gjitha kontratat e dhëna me qira të tokave. Balla përmendi rastin e familjes Balili, e cila tha se ka marrë nga shteti 90 hektarë tokë, dhe këtu ka bërë përgjegjës ish-ministrin Panariti. Ai tha se Panariti ka firmosur kontratë qiraje toke për Balilët. Ai nuk ia ka lënë mangët edhe kreut demokrat, duke i thënë se ende nuk dihet se kush i paguan faturat e mbledhjeve nëpër hotele.
“Panariti firmosi kontratë qiraje toke për Balilët. Ne u sekuestrojmë hotelet, po nuk ju marrim dot tokën, sepse kontratën e kanë qepur mirë.
Duhet të gjejmë zgjidhje ligjore për t’u anuluar kontratat. Në Belsh, liqenet janë dhënë me qera për peshk sipas kontratës që ka dhënë ish-aleati ynë. Në qëndër të Belshit peshqit ushqehen me gëlasa pulash. Këto duhen prishur, z.ministër. S’mund të flasë për oligarkët gjobaxhiu më i madh i tyre, Lulzim Basha.
Kompania e kunatit e bashkëshortes së Bashës jep konsulenca oligarkëve. A është kjo gjobë z. Basha? Unë mendoj që po. Të sqarojë Luli si fillim marrëdhëniet e tij me oligarkët. S’dihet ende kush paguan faturat e mbledhjeve të tua nëpër hotele.
Sa për Vettingun e politikës, nuk ka asnjë zgjidhje tjetër më të mirë se sa SPAK & BKH. Nënvizoj kërkesën tonë të bëjmë një audit të plotë për tokat e dhëna me qera. Ato që nuk janë shfrytëzuar, duhet t’i kthehen shtetit që t’i vendosë në dispozicion të ekonomisë shtetërore”.
