Kreu i grupit parlamentar të PS-së, Taulant Balla tha se vendimi i DASH për Adriatik Lallën legjitimoi zgjedhjen përkohshme Arta Markut. I ftuar në studion e lajmeve të Ora News, Balla theksoi se PD-LSI i detyrohen një ndjesë shqiptarëve për kaosin që shkaktuan seancën plenare të 18 dhjetorit 2017. Ai e cilësoi një vendim të rrallë të DASH, ndalimin e hyrjes në SHBA të ish-kryeprokurorit Adriatik Llalla dhe familjes së tij.
“Nuk po i hyj pjesës personale të zotit Llalla, aspektit të vendimit të marrë nga DASH i firmosur nga Tillerson, i cili është Sekretar i Shtetit. I rrallë si vendim por sot i kam bërë një pyetje PD dhe LSI, që të paktën sot ndoshta ishte dita që të kërkonin ndjesë për seancën e 18 dhjetorit. Kërkesën e Lulzim Bashës dhe Monika Kryemadhit që prokurori të vazhdonte të rrinte në detyrë. Besoj që të gjithë biem dakord që PD-LSI i kanë një ndjesë qytetarëve shqiptarë për atë seancë të turpshme e cila dëmtoi edhe njëherë tjetër imazhin e Shqipërisë kudo në botë dhe që sot u vërtetua me këtë vendim të DASH që paskemi pasur të drejtë”, deklaroi Balla.
