Sekretari i Përgjithshëm i Partisë Socialiste, Taulant Balla ka akuzuar Bashën se po mundohet të sillet si polic, prokuror apo gazetar dhe se nuk bën dot detyrën e kreut të PD-së.
Balla i përmend Bashës Agron Kapllanajn, i cili është dënuar me dy vjet për heqje lirie, ndërsa kreu i PD-së, shkruan ai, nuk merr asnjë përgjegjësi për këtë.
REAGIMI I BALLËS:
Reagim i Sekretarit të Përgjithshëm të PS, Taulant Balla: Është shumë e qartë për të gjithë pse Lulzim Basha po mundohet të sillet si polic, prokuror apo gazetar. Sepse Lulzim Basha nuk bën dot detyrën e Kryetarit të Partisë Demokratike. Kryebashkiaku i Lulzim Bashës Agron Kapllanaj, është dënuar me 2 vjet heqje lirie për kryerjen e veprës penale të “vjedhjes”, por Kryetari Basha nuk jep asnjë përgjigje dhe nuk merr asnjë përgjegjësi për këtë. Kryetari i Partisë së Agron Kapllanajt flet edhe 10 herë në ditë për të tjerët, për krimin dhe të inkriminuarit, por ka 3 ditë që nuk flet për të dënuarin për “vjedhje”, të cilin Basha e mbrojti duke shkelur Ligjin në KQZ.
