Plagosja rëndë në kokë me shufër hekuri e ish-bodigardit të Berishës dhe djalit të tij u bë nga militantë të LSI-së dhe jo nga policia, siç pretendoi ish-kryeministri. Mësohet se përplasja degradoi në përdorimin e mjeteve të forta për shkak të një flamuri të LSI-së.
Ka qenë Erjon Çela ai që i ka thënë një militanteje të LSI-së, që të hiqte nga dora flamurin e kësaj force politike.
Pas kësaj, ka ndërhyrë një person me paterica, i cili ka thënë se “nuk ka përse ta heqë flamurin”. Sherri ka vijuar më tej, derisa kanë ndërhyrë disa persona që e njihnin gruan me flamurin e LSI-së, e një prej tyre, Zamir Sijani tashmë i arrestuar, ka përdorur shufër hekuri, duke plagosur rëndë në kokë babë e bir (ish-bodigardi Ymer Çela me të birin Erjon Çela).
Policia ka arrestuar sot Zamir Sijanin, banues në fshatin Xhafzotaj të Durrësit, i cili është person me precedentë penal, pasi ka qenë dënuar më parë për trafik droge, mbajtje pa leje të armëve, municioneve dhe lëndëve shpërthyese.
