Deputeti demokrat, Ervin Salianji, ka ankimuar shtyrjen e hetimeve për çështjen “Babale”. Në një prononcim për mediat, Salianji u shpreh se Prokuroria është tërësisht politike, duke shkelur ligjin.
“Është një Prokurori tërësisht politike, dhe në shkelje të ligjit dhe Kushtetutës, prokurori që vazhdon çështjen është i njëjti prokuror që nuk ka guxuar të marrë vetë mostrat e zërit të vëllait të ish-ministrit Xhafaj, por ia ka lënë të gjithë veprimet proceduriale Policisë së Shtetit në konflikt të plotë interesi. Prokurori tjetër që i është shtuar Prokurorisë është një person që ka lidhje familjare të afërta me drejtuesin e Ministrisë së Brendshme sot. Është një hetim terësisht politik, nuk ka arsye për zgjatje të hetimeve.
Po bëhet vetëm për të mbajtur një tymnajë dhe për të mos i dhënë drejtim lidhjes së qeverisë me krimin, dhe favorizimit të trafikut të drogës nga ana e qeverisë Rama dhe ish-Ministrit të Brendshëm të tij. Ne kemi kërkuar proceduralisht thjesht për të mbajtur në dijeni publikun që vazhdon një hetim jo për personin që sot është në burg në Itali, por për gazetarin dhe ne që e kemi denoncuar. Qeveria vazhdon të tentojë si në shumë gjyqe të tjera, se nuk është gjyqi i vetëm që kam me qeverinë për denoncime të aferave korruptive apo të lidhjes së saj me krimin. Po njësoj do ti denoncojmë. Për këto arsye kemi marrë një vendimmarrje që na çon te qytetarët. Nesër në orën 10 para Parlamentit të gjithë qytetarët”.
