Khabib Nurmagomedov edhe pse fitoi duelin historik përballë Conor McGregor rrezikon të mbetet duarbosh, pasi UFC mund ti heqë titullin kampion bote për shkak të përleshjeve jashtë kafazit. Babai i luftëtarit rus ka qenë në qendër të vëmendjes ditët e fundit, pasi ai është sulmuar edhe nga McGregor.
Abdulmanap Nurmagomedov, babai i Khabib ka reaguar pas këtyre incidenteve duke kritikuar djalin e tij për atë kaos që shkaktoi. “Do të jem i ashpër me këtë. E kam paralajmëruar. Për mua, disiplina vjen e para”, ka thënë Abdulmanap Nurmagomedov për televizionin ‘Ren TV’.
“Ju mund të bëni çfarë të doni brenda kafazit, por jo edhe jashtë, pasi aty ka fëmijë, gra dhe persona të moshuar. Jashtë kafazit duhet të ketë paqe mes të dy sportistëve, pasi ky është vetëm një sport”, ka përfunduar babai i Khabib.
30-vjeçari rrezikon të humbasë titullin, nëse do të dënohet nga Komisioni i Disiplinës. Në një deklaratë dhënë më herët, presidenti i UFC-së, Dana White u shpreh se nuk do të veprojnë pa mësuar se çfarë vendimi do jepet, por duke njoftuar se nëse pezullohet për një kohë të gjatë, që mund t’i kalojë një vit, atëherë do t’i hiqet titulli kampion, të cilin e mbrojti ndaj McGregor.
