Pamjet e rrahjes së të moshuarës në qendrën për përkujdesjen e të moshuarve “Orenda” në Pejë, kanë tronditur vendin. Infermierja Aurona Pelaj ka deklaruar para hetuesve se në ditën kritike kishte shkuar te ndihmonte koleget, të cilat po merreshin me të moshuarën (viktimën e rastit), pasi sipas saj ajo ka qenë agresive.
Dhunën që ka ushtruar ndaj saj, ajo e ka arsyetuar duke thënë se “ajo e para më ka sulmuar”, teksa ka thënë se viktima ka kaluar atë ditë kriza nervoze dhe ka shkaktuar “telashe” në hapësirat e qendrës.
Avokati Arianit Koci ka treguar se deri në sa vite burg mund të dënohet infermierja Aurone Pelaj, që dhunoi të moshuarën në qendrën “Orenda” në Pejë.
Sipas tij, nëse do ta mbronte të dyshuarën, atëherë do t’i “kishte thënë që ta pranojë fajësinë ose të mbrohet në heshtje”.
“E kisha mbrojt pa asnjë dilemë, por kësaj infermieres i kisha thënë me pranu fajësinë ose mu mbrojt në heshtje, nuk e kisha leju me bë asnjë lloj arsyetimi, se veç po e rëndon pozitën e vet procedurale, e me ligj se ka me rëndu veten”, tha Koci.
“Prokuroria e ka fillu me “sulm”, për personat e ndjeshëm dënimi maksimal është me 3 vjet burgim, por duhet me i këqyr të gjitha rrethanat, por kjo është e drejtë e Prokurorisë. Prokuroria ka me vlerësu pas të gjitha provave”, theksoi ai në T7.
