Rreth dy muaj më parë, “Stop” transmetoi rastin e avokatit Sokol Berberi, i cili i mori 3 mijë euro një qytetari për vizë pune në Gjermani, dhe nuk i nxorri as vizën e nuk i kthente as paratë. Sot një qytetar nga Tirana, por që jeton në Londër, denoncon të njejtin avokat. Ai thotë se kërkoi nga Berberi, që t’i mundësonte një vizë shkollimi të fejuarës së tij dhe për këtë e pagoi me 11 mijë paund. Por dy vjet më pas, avokati nuk i ka kryer punë e nuk i jep as paratë. Në bisedën e fundit, avokati caktoi datën 12 janar 2022 për kthimin e parave.
Në datën 12 janar, denoncuesi i pajisur me kamera të fshehtë, takon avokatin Sokol Berberi, për t’i kërkuar shumën prej 11 mijë paund, siç kishin rënë dakord.
Por avokati thotë se kishte pasur shumë probleme, ndaj e shtyn kthimin e shumës për në 14 janar.
Qytetari: Tashi ne…të mora atë ditë në telefon kur ishe e të thashë: a je i sigurtë, thashë, që do e lëmë filan ditë….të thashë mos ta anuloj biletën. Ti më the në 12 e ke të sigurtë 1000%.
Avokati Sokol Berberi: Po!
Qytetari: Dhe data 12 është sot.
Avokati Sokol Berberi: E di, e di, e di.
Qytetari: A kupton?
Avokati Sokol Berberi: Tani, Sokolin do ta tolerosh me mirëkuptimin tënd deri pasnesër në drekë! Ti qenke duke u nis, kështu që të ndahemi si miq! Të lutem, më mirëkupto!
Qytetari: Tani iku edhe data 12.
Avokati Sokol Berberi: Nga data 15 në drekë!
Qytetari: Jo 15, jo.
Avokati Sokol Berberi: 14! Më fal!
Qytetari: Pasnesër më the.(14 janar)
Avokati Sokol Berberi: Kujtova, se është 13 sot.
Qytetari: Jo, jo se s’kam…unë dua të iki, që ta mbaroj këtë punë! Mos e kthej më kokën mbrapa tani!
Avokati Sokol Berberi: S’ke për ta kthyer kokën mbrapa! Absolutisht e kam, e kam….
Qytetari: E sa përqind i sigurtë je në këtë rast?
Avokati Sokol Berberi: Po, patjetër!
Qytetari: Sa përqind, sa përqind?
Avokati Sokol Berberi: 5 milionë përqind!
Qytetari: (Qesh) Ti më kënaq mu!
Avokati Sokol Berberi: Ah, mos më qesh! Mos më qesh, se kam pas halle, kam pas probleme! Ta them me sinqeritet!
Bashkë me qytetarin, gazetarja e “Stop” takon avokatin në 14 Janar, por avokati premton për të disatën herë, se do i japë paratë, kësaj radhe në 18 Janar.
Pasi “u mbërthye” nga kamerat e “Stop” avokati Sokol Berberi i kthen qytetarit 11 mijë Paund, që i kishte marrë për vizën e shkollimit të së fejuarës.
Kjo e fundit shpreh mirënjohjen dhe thotë, se pa këmbënguljen tonë nuk kishte për t’i marrë paratë, siç i kishte ndodhur për dy vjet me radhë.
“Kishim dy vjet që nuk i merrnim lekët. Shumë faleminderit emisionit Stop që pas 2 vitesh na zgjidhët problemin”, tha ajo./tvklan.al
