Një ngjarje e frikshme ka ndodhur ditën e hënë, në aeroportin Valencia Manises në Spanjë, ku një avion i cili po ulej në pistë, është mbushur me tym nga brenda.
Sipas mediave të huaja, fluturimi BA 422 nga Aeroporti Heathrow i Londrës për në Valencia, Spanjë, ishte duke zbritur Valencia, sipas British Airways, kur kabina papritmas u mbush me tym.
“Asnjëherë nuk kam provuar frikë si kjo”, ka thënë Dani Meroño Bori, një pasagjer në fluturim.
Menjëherë pasi avioni përfundoi uljen e tij, shërbimet e urgjencës së aeroportit kanë nxituar drejt aeroplanit, për t’iu ardhur në ndihmë pasagjerëve.
Sipas British Airways, në bord ndodheshin 183 persona, ku përveç ekuipazhit ishin 175 pasagjerë.
Raportohet se për fat të mirë nuk kishte ndonjë të lënduar rëndë, edhe pse tre pasagjerët u dërguan në spital pas evakuimit “si masë paraprake”, sipas linjës ajrore.
