Dalin të tjera detaje lidhur me atentatin e ndodhur mbrëmjen e djeshme, në ambientet e jashtme të një hoteli në autostradën Mamurras-Lezhë.
Si pasojë e këtij atentati, kanë humbur jetën dy biznesmenët Bujar Lika dhe Paulin Gjergji. Ky i fundit humbi jetën ditën e sotme në spital. Nga kjo ngjarje mbeti i plagosur edhe 21-vjeçari, Kreshnik Tusha.
Deri më tani raportohet të jenë shoqëruar në polici rreth 30 persona të dyshuar apo që kanë dijeni për ngjarjen. Ndërkohë, pritet ende të merret dëshmia e 21-vjeçarit të plagosur.
I riu i është nënshtruar mbrëmë një operacioni, pasi ka marrë tre plumba në këmbë. Bëhet me dije se policia ka sekuestruar edhe një pistoletë në dorën e viktimës Lika, që dyshohet të jetë edhe shënjestër e atentatit.
Ai njihet si person me precedentë të mëparshëm penal. Lika është i njohur edhe me mbiemrin Hasani dhe dyshohej si i përfshirë në një ngjarje kriminale në Linzë, ku mbeti i vdekur Enton Nikaj.
Ai po ashtu njihet si mik i ngushtë i një personi me precedent penalë, i njohur edhe si biznesmen në fushën e lojërave të fatit.
