Redjan Rraja ka mohuar përfshirjen e tij në atentatin ndaj prokurorit Arjan Ndoja, teksa ka dalë për masën e sigurisë në Gjykatën e Krimeve të Rënda. Gjykata caktoi ndaj tij masën “arrest me burg”, duke e vlerësuar si të ligjshëm arrestimin e tij.
Ai ka deklaruar se ditën kur ka ndodhur atentati, ka qenë duke përshkuar rrugën Tiranë-Durrës-Fushë Krujë. Më tej, është shprehur se nuk njeh askënd nga personat e plagosur nga atentati, dhe se gjithçka e ka mësuar nga mediat.
Rraja u vu në pranga në pikën kufitare në Shkodër, në tentativë për t’u larguar drejt Malit të Zi.
Redjani njihet nga të gjithë me pseudonimin “Dara”, pasi sipas hetuesve, ai në çdo veprimtari kriminale është gjakftohtë dhe i saktë.
Ai akuzohet si një nga autorët e atentatit ndaj prokurorit Arjan Ndoja, më 1 nëntor 2019. Rraja u zbulua nga ADN-ja e gjetur në makinën ‘Benz’ ngjyrë gri, që u gjet e padjegur në Ishëm. Policia dyshon se përveç tij, të përfshirë në këtë atentat janë edhe 3 persona të tjerë.
