Policia e Elbasanit ka arrestuar 4 persona, të cilët dyshohen për atentatin me tritol ndaj biznesmenit shkodran, Lulzim Kulla, atentat ky që ndodhi më 13 janar.
Të arrestuarit dyshohet se organizuan shpërthimin me tritol në lagjen “Rus” në Shkodër, me objektiv Lulzim Kullën, ndërsa ky i fundit mbeti i plagosur.
Po ashtu, nga shpërthimi i fortë i tritolit mbetën të plagosur 8 persona, së bashku me shënjestrën e atentatit.
Pas atentatit u deklarua se po punohej për identifikimin e personit që ka vendosur motoçikletën me një sasi prej 500 gramë tritol të llojit C4 pranë makinës së Kullës.
Lulzim Kulla rezulton person me precedentë penale, ndërsa njihet si gjobëvënës në qytetin e Shkodrës.
Prej vitesh, ai nënshtron tregtarët në lagjen “Rus” në Shkodër duke u vendosur “tarifë” të përmuajshme për garantimin e objekteve tregtare. Historia e ‘gjobave’ nisi që në vitin 1997. Thuhet se bizneset detyrohen që të paguajnë 50 mijë lekë të vjetra në muaj grupit të të fortëve. Kulla njihet si një person i dhunshëm, ndërsa nuk kanë qenë të pakta rastet kur është përfshirë në konflikte.
Mes të tjerash ai akuzohet se ka marrë pjesë në torturimin deri në vdekje të një prej tregtarëve, që nuk i është bindur diktatit të tij. Bëhet fjalë për një tregtar për shitjen e gazit, për vdekjen e të cilit nuk pati asnjë autor. Vetëm disa muaj më parë, Prokuroria nisi një hetim për gjobëvënie ndaj tregtarëve në Shkodër, por pavarësisht se operacioni u shoqërua me disa të arrestuar, çështja u sfumua nga dëshmitë e vetë tregtarëve, të cilët nga frika janë shprehur se paratë paguheshin për ruajtjen e dyqaneve dhe se ndaj tyre nuk është ushtruar presion për një pagesë të tillë, shkruan BalkanËeb.
Po ashtu 42-vjeçari rezulton se është një nga të arrestuarit për kultivim kanabisi në zonën e Dukagjinit.
Edhe pse ai konsiderohej si një prej organizatorëve për kultivimin e një sasie të madhe të bimëve narkotike, Kulla u la i lirë pas vetëm 6 muajsh. Nuk është e qartë se si 42-vjeçari ka arritur t’i shmanget dënimit, duke bërë që çështja të mbyllet.
