Mesditën e së shtunës, një atentat me eksploziv i mori jetën një të riu. Në automjetin me të cilin po udhëtonte 27-vjeçari Aleksandër Sadikaj, të cilit iu vendos dhe shpërtheu një sasi prej 200 gramë tritol, u gjet edhe një armë zjarri. Arma është e llojit pistoletë dhe dyshohet se viktima e mbante në makinë për vetëmbrojtje, për shkak të ngjarjeve që kishte përjetuar në të kaluarën. Lënda plasëse ishte vendosur poshtë pjesës së parme të automjetit tip “Golf”, dhe dyshohet se shpërthimi ka qenë i telekomanduar. Rreth orës 13:00 të së dielës, 27-vjeçari i është drejtuar autostradës Tiranë-Elbasan, aty dhe ku u regjistrua shpërthimi i lëndës plasëse. Grupi i hetimit ka sekuestruar kamerat e sigurisë në zonat ku ka kaluar viktima, për zbuluar vendin ku i është vendosur tritoli automjetit që lëvizte i riu. Brenda makinës që lëvizte i riu, policia gjeti një armë zjarri tip pistoletë, ç’ka ka shtyrë hetuesit tek pista e konflikteve që mund të ketë patur viktima. Aleksandër Sadikaj ishte një emër i njohur për policinë.
Ngjarjet ku ishte përfshirë Sadikaj në Shqipëri:
٠Më 09.04.2011 është arrestuar në Berat, pasi së bashku me një person tjetër kanë tentuar të vjedhin në subjektin AlbTelecom-Berat;
٠Më 30.04.2011 është shpallur në kërkim nga Komisariati i Policisë Vlorë, pasi Gjykata e Vlorës i ka caktuar masën e sigurisë “Arrest në burg”, për veprën penale “Vjedhja”, kryer në bashkëpunim;
٠Më 31.05.2017 është shpallur në kërkim nga Komisariati i Policisë Nr.2 Tiranë, pasi Gjykata e Tiranës i ka caktuar masën e sigurisë “Arrest në burg”, për veprën penale “Kundërshtimi i punonjësit të rendit publik”. Më 23.08.2018, Gjykata e Tiranës e ka dënuar me 8 muaj burgim, për këtë vepër;
٠Më 29.05.2017 është shpallur në kërkim nga Komisariati i Policisë Nr.2 Tiranë për veprat penale “Goditje për shkak të detyrës”, “Mosbindja ndaj urdhrit të punonjësit të policisë së rendit publik” dhe “Kundërshtimi i punonjësit të rendit publik”;
٠Më 09.07.2019 është shpallur në kërkim nga Komisariati i Policisë Sarandë, pasi në bashkëpunim me një shtetas tjetër, gjatë një konflikti për motive të dobëta, kanë plagosur me thikë shtetasin A. D., duke i shkaktuar dëmtime serioze në trup. Më datë 30.07.2019, për këtë ngjarje, Gjykata e Sarandës i ka caktuar masën e sigurisë “Arrest në burg”, për veprën penale “Vrasja me dashje”, mbetur në tentativë.
Atentat mafioz
Atentati që i mori jetën 27-vjeçarit Sadikaj, mendohet të jetë kryer nga vrasës me pagesë. Atentati dyshohet se është i porositur dhe lidhet me të shkuarën e errët të viktimës. Për vrasjen e të riut u përdor një sasi e madhe tritoli, e telekomanduar nga një distancë e afërt me vendin e ngjarjes, duke ngritur dyshime për vrasës me pagesë dhe të mirëtrajnuar për ngjarje të tilla kriminale. Shpërthimi në vendngjarje ka qenë i fuqishëm, ku të lënduar lehtë kanë mbetur edhe një grua me fëmijën e saj. Ajo ka qenë duke lëvizur me mjetin e saj në zonë, kur ka ndodhur shpërthimi dhe nga frenimi i fortë, është lënduar me fëmijën, por fatmirësisht të dy janë jashtë rrezikut për jetën.
