Lidhur me ngjarjen e rëndë ndodhur një ditë më parë në Vlorë, policia hedh hije dyshimi se kanë qenë tre persona, të cilët kanë shënjestruar biznesmenin Vasil Dervishaj, i cili u ekzekutua me armë zjarri. Krimi ndodhi rreth orës 23:00 të së hënësn në lagjen “Pavarësia”, ose siç edhe njihet ndryshe, si zona e ish-Kombinatit të Peshkut. Sipas policisë, i riu ka qenë i vetëm në makinë, teksa ishte nisur drejt banesës së tij.
Autorët
Autorët i kanë zënë pritë të riut dhe e kanë qëlluar me breshëri automatiku, teksa mjeti ka qenë në ecje. Dyshohet se autorët janë larguar nga një mjet tip “Benz” me ngjyrë të zezë, i cili ka marrë drejtimin për nga Fieri.
Shënjestra
Policia e ka të vështirë hetimin, pasi në atë zonë subjektet nuk kanë patur të instaluara kamera të sigurisë. Burime, ende jo zyrtare të bluve të Vlorës thonë se shënjestra ka tentuar t’u shpëtonte autorëve, duke dalë nga mjeti i tij, me qëllim që të largohej në këmbë. Dyshohet se ai ka dalë nga makina i plagosur, ç’ka ka ndikuar që njëri prej autorëve t’i afrohej dhe ta qëllonte edhe me pistoletë, me një plumb në kokë.
Plaga ka qenë vdekjeprurëse për Dervishajn, i cili ka rënë në tokë. Banorët kanë dhënë alarmin për të shtënat e armës, dhe në vend mbërriti menjëherë patrulla më e afërt nga ku konstatuan trupin pa jetë të të riut.
Arma në vendin e ngjarjes
Rreth 30 metra larg nga vendi i ngjarjes, uniformat blu kanë gjetur një armë automatike, e cila dyshohet se iu përket autorëve të krimit.
Viktima, një emër i njohur për policinë
Vasil Dervishaj njihet si pronar i lokalit “Gimoka”, por edhe një subjekt me pajisje elektro-shtëpiake. Emri i tij nuk ishte i panjohur për Policinë e Vlorës, pasi disa herë ai është shoqëruar dhe proceduar për “trafik droge”, por për shkak të mungesës së provave, i riu ka arritur të dalë gjithnjë pa u dënuar.
Pistat e hetimit
Pista kryesore e hetimit mbetet ajo e pazareve të drogës. Dyshohet se kjo është bërë shkak për organizimin e vrasjes së tij. Por policia nuk përjashton edhe pistat e tjera të hetimit, përfshirë këtu edhe atë të hakmarrjes, për shkak të një vrasje të kryer nga vëllai i viktimës, në vitin 2005. Bëhet fjalë për ngjarjen që bëri bujë asokohe, jo vetëm në Vlorë, por në të gjithë vendin, ku vëllai i viktimës, shtetasi Derlin Dervishaj, vrau Joana Dudushin, e quajtur ndryshe si “Stela”. Ngjarja ndodhi në Plazhin e Vjetër në Vlorë, ku trupi i saj u gjet në datën 2 gusht 2005, i groposur në Plazhin e Vjetër në Vlorë.
Paraprakisht, policia bëri të ditur se dyshimet për një hakmarrje të mundshme janë të pakta, për shkak të rrethanave aktuale, por gjithsesi kjo nuk përjashtohet si pistë.
20 persona të shoqëruar në polici
Deri më tani janë shoqëruar 20 persona, mes së cilëve, sipas burimeve, është edhe një person i dyshuar se mund të jetë autor, apo të ketë dijeni për krimin. Për efekt hetimi, policia nuk bëri të ditur detaje të tjera në lidhje me personin, që deri në orët e vona ishte si i shoqëruar.
