Midis 80-100 tendave të vendosura në sheshin e Mandelës, midis rrugës Maurice-Flandin dhe linjës së tramvajit në Lion të Francës, janë rreth 200 njerëz. Në këtë grup përfshihen 30 fëmijë, kryesisht me kombësi shqiptare.
Në fund të muajit që lamë pas, për herë të dytë në dy muaj, drejtësia administrative urdhëroi evakuimin e sheshit. Por një gjë e tillë nuk ndodhi.
Të martën mbrëma, gjatë një takimi publik kushtuar pjesërisht kësaj lagjeje, kryetari i bashkisë së distriktit të tretë, Thierry Philip, u sfidua nga banorët për këtë çështje kaq të ndjeshme, që vetë ai e konsideron “jashtëzakonisht komplekse”.
“Ata nuk mund të qëndrojnë këtu”
“Shqiptarët gëzojnë lirinë e lëvizjes në zonën “Shengen”, por nuk janë pjesë e Bashkimit Europian, kështu që ata bëjnë kërkesa për azil. Më kujtohet se ky vend konsiderohet i sigurt”, tha Thierry Philip.
Ndërsa një banor e pyet: “Çfarë është planifikuar për ata tani që ka ardhur dimri?”. “Ata nuk mund të qëndrojnë këtu”, përgjigjet kryetari i bashkisë, duke shtuar se “dëbimi i urdhëruar nga drejtësia do të ndodhë përfundimisht”.
“Por është përgjegjësi e prefekturës. Është në dorën e saj për të zgjidhur problemin”, tha Philip. Sipas tij, autoritetet përkatëse, çdo dy ditë merren me pastrimin e sheshit ku ndodhen tendat për të siguruar “një minimum jetik”.
Së fundmi – thotë kryetari i bashkisë- ata gjithashtu marrin kompensim (jo të parëndësishëm) sepse janë azilkërkues.
Ndërkohë nga salla vijnë reagimet: “Pse do të ishte më pak e ligjshme të largohesh nga vendi kur dikush ka uri?”. “Nuk janë pagesa të parëndësishme. Është shumë e lehtë të thuhet”, shton një tjetër.
“Ne kemi marrë dhjetë e-mail në javë mbi këtë temë, ku gjysma na thërret bastard dhe pjesa tjetër na kërkon për t’i dëbuar ata …”, thotë Thierry Philip, i cili vijon duke thënë se do të takohen së shpejti me shoqatën Forumi i Refugjatëve.
“Askush nuk është i gabuar apo i drejtë, dhe ne përpiqemi të kryejmë një politikë të ekuilibruar, por e tejkalon të tretën. Unë, sidomos jam kryetar i bashkisë së një bashkie ku 5000 njerëz që punojnë dhe paguajnë taksa, presin me vite banesa sociale”, tha Thierry Philip.
