Ministri i Drejtësisë, Ulsi Manja, ka paralajmëruar një aksion tjetër në zyrat e Kadastrës në vend. Ministri i Drejtësisë tha se zyrtarë dhe ish-zyrtarë që kanë abuzuar me dosjet e pronave shtetërore dhe private, do të jenë pjesë e hetimit. Ai ka shigjetuar abuzuesit me pushtetin, se nuk duhet ta bëjë gjumin e qetë, pasi do të jetë nën monitorim. Deklarata e ministrit vjen një ditë pas operacionit në Kadastrën e Sarandës, ku u vunë në pranga katër zyrtarë. Në një dalje për mediat, Manja tha se Drejtoria Anti-Korrupsion që është në varësi të Ministrisë që ai drejton, ka aktualisht në proces një hetim për tjetërsimet dhe falsifikimet me pronat, kryesisht në bregdet.
“Asnjë zyrtar dhe ish-zyrtarë abuzues me detyrën, nuk duhet të ndjehet i sigurtë dhe ta bëjnë gjumin e qetë. Dua të falenderoj qytetarët që denoncojnë. Aksioni i djeshëm erdhi pas denoncimit të një qytetari.
Denoncimet nuk duhet t’i bëjnë pasi ata nuk zgjidhin hallin, por menjëherë pasi zyrtarët i shtyjnë në korrupsion. Nuk kemi mbaruar punë as me Kadastrën e Sarandës, dhe as në të gjitha zyrat.
Ka në proces një super hetim me të gjitha abuzimet me fokus të veçantë bregdetin. Dosja që shtrihet në kohë, kam parasysh jo vetëm periudhën e qeverisjes tonë, por që në momentet kur kanë filluar abuzimet me pronën.
Në këtë hetim përfshihen zyrtarë dhe ish zyrtarë të Kadastrës, pas përfundimit të këtij hetimi rezultatet konkrete do të jenë në duart e SPAK.
Dua të jem i qartë ne emër të qeverisë e them sot çdo abuzues me pronën pavarësisht gradës që mban, çdo nënpunës që ofron një shërbim publik ndaj qytetarëve, do të përgjigjet dhe do të përballet me forcën e ligjit”, tha Manja.
