Hetuesit e kanë të qartë se si ka ndodhur ekzekutimi mafioz i ish-policit Santiago Malko, dhe mënyra si janë larguar autorët. Në këtë atentat, nga veprimet e kryera deri tani dyshohet se janë përdorur dy mjete.
Në vendin e vrasjes pranë zonës së Porcelanit, autorët kanë qëlluar nga Benz C Clas. Kamerat e sigurisë e kanë filmuar këtë mjet, i cili ishte vjedhur në Lezhë, dhe targat në Krujë në muajin mars. Me këtë mjet autoret janë larguar në drejtim të fshatit Ferraj, ku edhe e kanë djegur në një zonë e cila ndodhet disa kilometra larg zonave të banuara.
Në mjetin Benz, autorët kanë lënë dhe dy armët që u përdorën në vrasje. Në këtë zonë, atentatorët dyshohet se i ka pritur një mjet tjetër. Nga dëshmitë e marra dyshohet se është një Volkswagen, por deri tani policia nuk ka gjetur asnjë gjurmë të tij. Laboratori i policisë ka përfunduar ekspertimin e dy armëve, të cilat u gjeten në makinën e djegur, dhe është konfirmuar se ato janë përdorur në vrasje, bën me dije ‘tvklan.al’.
Grupi hetimor është duke këqyrur ende filmime të kamerave të sigurisë në rrugën që ndoqi mjeti i autorëve për tu larguar, por edhe para se të ndodhte ekzekutimi.
Vrasja është kryer nga njerëz profesionistë, pasi të pakta ishin gjurmët që u lanë në vendngjarje. Një breshëri plumbash u derdhën mbi makinën e Santiago Malkos, që në fund i morën dhe jetën.
26-vjeçari ishte pjesë e bandës së Ervis Martinajt, i njohur ndryshe si “bosi” i lojërave të fatit. Malko ka qenë i përfshirë në ngjarjen e 4 tetorit të 2018-s, kur ndodhi vrasja e Fabian Gaxhës në zonën e ish-Bllokut, pas një përplasje me armë.
Gjithashtu, ish-polici i vrarë është përfshirë në një sherr me dy vëllezërit Lashi në vitin 2016, për një borxh prej 1 mijë eurosh.
Malko kishte përfunduar kursin për Patrullë të Përgjithshme, dhe ka qenë pjesë e kësaj strukture në Policinë e Tiranës vetëm për 3 muaj, nga ku u tërhoq vullnetarisht.
