Vojisllav Sheshelj nuk ndjen keqardhje për rolin e tij në luftërat në ish Jugosllavi. Tani 63 vjeç, ultra serbi-nacionalist është sërish deputet në parlamentin e Beogradit.
“Ne kurrë nuk do të heqim dorë nga ideja e një Serbi të Madhe”, këmbëngul ai, shkruan Tirana Today.
Një aleat i ngushtë i presidentit të ndjerë serb Slobodan Millosheviç, Sheshelj u shpall i pafajshëm në vitin 2016 për krime lufte dhe krime kundër njerëzimit gjatë luftërave të Ballkanit të viteve 1990 që u vranë së paku 140,000 njerëz.
Udhëheqësi radikal serb ishte akuzuar se qëndronte pas vrasjeve të dhjetëra kroatëve, myslimanëve dhe jo-serbëve të tjerë dhe shfajësimi i Shesheljit u shpall në vitin 2016, pasi një gjyq 8 vjeçar në Hagë dhe ishte një surprizë e madhe për të. Kryeministri i Kroacisë e dënoi vendimin si “të turpshëm”.
Dy vjet më vonë dhe gjyqtarët e OKB-së për krimet e luftës do të vendosin për një ankesë të ngritur nga prokurorët.
Ata pohojnë se Shesheli nxiti urrejtje nëpërmjet fjalimeve të tij të zjarrta mbi nacionalizmin “duke kërkuar të bashkojë të gjitha” territoret serbe “në një shtet homogjen që ai e quajti “Serbia e Madhe “.
Por në një intervistë me AFP, Sheshelj – i cili gjithmonë ka mohuar akuzat – tha se nuk do të shkojë në Hagë për dëgjimin në ish Tribunalin Penal Ndërkombëtar për ish Jugosllavinë (ICTY), funksioni i të cilit është marrë nga Mekanizmi për Tribunalet Penale Ndërkombëtare (MICT).
‘Ata janë serbë’
Objektivi politik i Partisë së tij Radikale Serbe (SRS) ekstreme, mbetet “të bashkojë brenda të njëjtit shtet të gjitha territoret ku jetojnë popujt serbë”, thotë ai, duke shtuar se serbët janë ndarë “për shkak të vullnetit të fuqive të mëdha, armiqve tradicionalë “.
Natyrisht, ai pranon, se kroatët dhe myslimanët boshnjakë “aktualisht janë kundër” këtij programi.
“Por ne duhet të vazhdojmë t’i bindim ata se janë serbë”, ka pohuar ai.
Ai thotë se “nga kombi serb janë formuar artificialisht dy kombe të reja: dy të tretat e kroatëve të sotëm janë serbë të lashtë të besimit katolik, sot kroatët flasin gjuhën serbe”.
Dhe myslimanët e Bosnjës janë gjithashtu me origjinë serbe, pohon ai. “Ata u kthyen në Islam gjatë okupimit të Perandorisë Osmane”.
Në sytë e tij, unifikimi i entitetit serb të Bosnjës Republika Srpska me Serbinë është vetëm një çështje kohe, sepse “kjo është dëshira e popullit serb që jeton atje”.
Sa për Kosovën, e cila në mënyrë të njëanshme shpalli pavarësinë në vitin 2008, ai tha se ish-provinca serbe me një shumicë shqiptare etnike “na takon plotësisht”.
“Askush në pushtet (në mesin e serbëve) nuk mund ta njohë Kosovën, sepse ai do të paguante me kokën e tij,” tha ai.
Sheshelj refuzon etiketën e gjenocidit për masakrën e Srebrenicës, mizoritë më të këqija të Evropës që nga Lufta e Dytë Botërore, kur në korrik 1995 forcat serbe boshnjake ekzekutuan rreth 8,000 burra dhe djem myslimanë.
“Kishte një krim, por jo gjenocid,” thotë ai.
“Krimi”, insiston, nuk është kryer nga autoritetet serbe, por nga një njeri, “Koloneli Ljubisa Beara”, ish oficer i lartë në ushtrinë serbe të Bosnjës, i cili vdiq në paraburgim në vitin 2017.
Shefi ushtarak serb boshnjak i kohës së luftës, Ratko Mlladiç, i cili u burgos për jetë në Hagë vitin e kaluar për gjenocid dhe mizori të tjera në luftërat e Ballkanit, duke përfshirë edhe në Srebrenicë, është “hero” për serbët, thotë ai.
‘Sarajeva do të jetë e Serbisë’
Pas një pengese serioze për partinë e tij në zgjedhjet lokale të muajit të kaluar në Beograd, fuqia e tij politike mund të venitet – edhe pse thotë se gjen ngushëllim te Napoleoni.
“Kujto Napoleonin dhe mërgimin e tij në ishullin e Elbës”, thotë Sheshelj.
“Kur u kthye ai ishte pa një ushtri, por sa më afër arriti në Paris, aq më tepër ushtria e tij u rrit. Është e rëndësishme që të kemi një gjeneral të mirë “.
I lindur në kryeqytetin boshnjak të Sarajevës, Sheshelj nuk mund të vizitojë shtëpinë e tij të fëmijërisë pasi ai konsiderohet si një kriminel lufte nga shumë njerëz atje.
Por ai thotë se: “Sarajeva do të kthehet përsëri në një qytet serb”. TIRANA TODAY
