Një pjesë e mirë e Cristiano Ronaldo që futbolldashësit e shijojnë në ditët e sotme, është krijuar në Manchester. Në kohën kur portugezi u transferua në Angli te United, mësoi shumë gjëra ndërsa së fundmi një nga njerëzit më të afërt të trajnerit Alex Ferguson, asistenti i tij Mike Phelan, ka zbuluar disa nga prapaskenat me CR7 e asaj kohe.
“Lodhej shpejt, ishte si një sapun. Por, gjithnjë të sfidonte dhe kërkonte më shumë. Detyra e parë me të ishte ta shndërronim në një lojtar skuadre dhe ia arritëm. Në stërvitje ai kishte ushtrime të veçanta që nuk i pëlqente dhe ne e detyronim t’i bënte. E kemi parë kur luante me Real Madrid dhe shumçka i kishte trashëguar nga Manchester United.
Ai arriti që disa aspekte t’i çonte në nivelin më të lartë të ekselencës dhe kjo ishte një kënaqësi e madhe. Nuk pretendoj që Cristianon e kam krijuar unë. Shumë njerëz kanë influecuar te ai, por influenca më e madh ka qenë vetja e tij. Impulsi i tij personal është fantastik”, u shpreh Phelan.
