Artisti i muzikës “Jazz” nga Afrika e Jugut, Musa Manzini, ka surprizuar stafin mjekësor, ku gjatë ndërhyrjes në tru, ai ka luajtur me kitarë. Ai ia hodhi me sukses, pas një ndërhyrje që zgjati pot 6 orë, teksa ishte diagnostikuar me tumor në tru. Kirurgët, pavarësisht vështirësisë, e morën me qetësi teksa shikonin që pacienti po argëtohej.
Në një video që është përhapur në rrjetet sociale, muzikanti i famshëm shihet duke i rënë kitarës, gjatë operacionit që zgjati jo më pak se gjashtë orë. Mjekët e patën më të lehtë teksa ai luante në kitarë, pasi mund të vëzhgonin më mirë zonat e trurit që artisti i përdorte për të bërë muzikë dhe të ndërhynin në pjesët e prekura nga tumori, në mënyrë që t’i rifunksionalizojnë disa lëvizje të gishtërinjve që i ishin dobësuar.
“U ndieva në mënyrë të çuditshme dhe të parehatshme. Është e vështirë të përqendrohesh kur je nën ndikimin e anestezisë, dhe dëgjon tingullin e veglave në kokë”, deklaroi artisti, një javë pas operacionit.
Mjekët vendosën që ta mbanin me vetëdije pacientin gjatë operacionit, në mënyrë që të dallonin më lehtë se cilat zona të trurit nuk ishin duke funksionuar si duhet dhe të ndërhynin në to, shkruan “Reuters”.
