Lëvizja Socialiste për Integrim, në kuadër të rekrutimeve në radhët e saj, ka hedhur sytë nga artistët. Të pakënaqur ndaj politikave qeverisëse përgjatë këtij mandati 4-vjeçar edhe artistët duket se kanë kthyer kokën nga kjo parti.
Për Laert Vasilin, aktor dhe regjisor i njohur, LSI-ja duket se është alternativa e duhur në këtë garë zgjedhore. Ai ka zgjedhur t’i bashkohet kësaj force politike me shpresën se platforma e saj do të ngjallë shpresë e do të ndryshojë realitetin, ku të rinjtë i kanë sytë nga bota.
Kandidatja për deputete, Klajda Gjosha, teksa e prezantoi artistin e njohur para të rinjëve të Tiranës, tha se ai pёrfaqёson njё grup tё madh artistёsh që kanë vendosur t’i bashkohen LSI-së.
Ndërsa Vasili, u shpreh i sigurt për fitoren dhe për të ardhmen e Shqipërisë. “Ju nuk jeni nga ata që do bëni dokumentet për të fituar lotarinë dhe për të braktisur këtë vend, por ju do jepni energjinë tuaj, për ta bërë këtë vend, siç zgjodha unë pas 20 vjetësh të kthehem në Shqipëri”, u tha Vasili të rinjëve në këtë aktivitet.
