Gazetari Artan Hoxha ka lëshuar mbrëmë një deklaratë të fortë, teksa ishte i ftuar në studion e emisionit “Opinion”.
Duke iu referuar arrestimeve të ish-drejtorëve të ARRSH-së, Hoxha tha se nuk duhet të etiketohet forca politike që këta drejtorë kanë përfaqësuar, sepse shumë shpejt do të ketë arrestime edhe nga Partia Socialiste, në të njëjtën çështje.
“Si kokrra fiku”, tha gazetari.
Lidhur me arrestimet e ish-drejtorëve të ARRSH-së, lidhur me abuzime në rrugën Gjinar- Elbasan, Hoxha u shpreh se e njëjta prokurore Elisabeta Imeraj, që çoi para akuzave Tahirin ka çuar para akuzave edhe ish-drejtorët e rrugëve.
Hoxha tha se hetimet për ish-drejtorët Xhika dhe Toma kanë nisur prej 3 vitesh por që u penguan. Prokurorja e çështjes është penguar nga eprori i saj paraardhës:
“Të dy drejtorët janë akuzuar për shpërdorim detyre dhe jo për korrupsion. Që prej tre vitesh janë bërë letrat, por nuk është hetuar pasi kjo çështje është penguar nga eprori paraardhës. Ka pasur ndryshim kohët e fundit sepse ka shkuar një prokuror tjetër.
Kjo çështje ka qenë aq gati sa unë mund të them se ka vetëm një javë që janë bërë arrestimet dhe ju them se brenda javës tjetër çështja do të shkojë për gjykim.”
