Duke diskutuar për buxhetin e vitit 2019, një përfaqësues i Prokurorisë së Përgjithshme ka kërkuar shtesën e 197 punonjësve. Në Komisionin e Ligjeve kanë qenë të pranishëm vetëm deputetët e mazhorancës. Ata janë surprizuar nga kërkesa e saj.
Përfaqësuesi i prokurorisë ka treguar se kërkon këta punonjës, pasi 100 prej tyre do të jenë sekretarë.
“30 i duam oficerë të policisë gjyqësore. 100 sekretarë pranë çdo prokurori.
5 specialistë për dekriminalizimin, 30 ekspertë të fushave të ndryshme sipas ligjit të ri”, ka thënë përfaqësuesi i Prokurorisë.
Pasi ka dëgjuar kërkesën e parashtruar, deputeti socialist Bashkim Fino ka dalë kundër. Ai e ka cilësuar si një shifër të frikshme, dhe absurde.
“Shifër e frikshme. Ministria e Financave ka shtuar 50. Mua më duket absurde. Unë personalisht nuk do ta pranoja.
Ka pasur 130 milionë lekë për investim, por ka shpenzuar vetëm 52. Jua heqim fare. Ja japim një njeriu që di të investojë më mirë”, ka thënë Fino.
