Deputeti i Lëvizjes Vetëvendosje, Albin Kurti është arrestuar sërish nga Policia e Kosovë. Mediat kosovare, duke ju referuar burimeve të tyre brenda Gjykatës Themelore të Prishtinës, njoftojnë se Albin Kurti është arrestuar sërish bashkë me deputeten Donika Kadaj.
Deputetët Kurti dhe Kadaj janë dërguar në një nga qendrat e paraburgimit jashtë Prishtinës.
Kujtojmë se Kurti e Kadaj ishin në arrest shtëpie, por të dy dje kishin dalë në shesh për të festuar fitoren e Shpend Ahmetit në Prishtinë.
Albin Kurti u arrestua disa ditë më parë bashkë me deputetet Albulena Haxhiut dhe Donika Kadaj-Bujupi, teksa deputetët i ishin drejtuar Kuvendit. Deputetët u arrestuan nga Policia e Kosovës pas një urdhër-arresti të lëshuar nga gjyqtari Beqir Kalludra për rastin e gazit lotsjellës që u hodh para një viti në Kuvend. Kalludra u caktoi deputetëve paraburgim, për shkak të mosparaqitjes së tyre në seancën gjyqësore ndaj hedhjes së gazit lotsjellës.
https://www.facebook.com/tiranatodaycom/videos/376845836093493/
Kurti, Haxhiu dhe Kadaj, akuzohen për hedhjen e gazit lotsjellës në Kuvendin e Kosovës gjatë seancave të vitit të kaluar, kur tentohej të bllokohej ratifikimi i marrëveshjes së Demarkacionit me Malin e Zi dhe ngritja e Asociacionit të komunave me shumicë serbe, sipas marrëveshjes së dalë nga dialogu me Beogradin.
