Dy persona janë vënë në pranga për vrasjen e vëllezërve Besmir dhe Viktor Haxhia, ngjarje kjo e ndodhur në 27 prill të 2020 në Durrës. Policia ka arrestuar shtetasit Besian Xhixha dhe Enver Diva, të cilët mendohet se janë kontraktuar nga Nuredin Dumani për të kryer vrasjen.
Mendohet se Xhixha dhe Diva kanë pasur si “detyrë” që të studionin territorin ku do të ekzekutoheshin dy vëllezërit. Por njëri prej tyre, Enver Diva u infektua me COVID, dhe në këtë mënyrë nuk kreu dot vrasjen.
Besian Xhixha dhe Enver Diva janë vënë nën akuzë për sigurim të kushteve dhe mjeteve për të kryer vrasje.
Ekspertët e kriminalistikës gjetën 55 gëzhoja në vendngjarje
Dy vëllezërit Besmir dhe Viktor Haxhia u ekzekutuan pranë tregut të makinave në zonën e ShënVlashit në Durrës. Ata ishin duke udhëtuar me një automjet tip “Volkswagen Golf”, kur u qëlluan me breshëri automatiku. Vëllezërit Haxhia me origjinë nga Puka dhe me banim në Durrës, ishin përkatësisht në sediljet e pasagjerit dhe shoferit.
Pasi ndodhi atentati mafioz, ekspertët e kriminalistikës gjetën 55 gëzhoja në vendin ku u vranë Besmir dhe Viktor Haxhia. Plot 55 herë është qëlluar drejt makinës “Golf”, me të cilën ata po shkonin drejt banesave të tyre. Dy vëllezërit nuk kanë patur mundësi të mbroheshin, pasi u është zënë pritë dhe u është bllokuar rruga.
Dy viktimat
Viktor Haxhia, njëri nga vëllezërit, viktimë e këtij atentati, që nga nëntori 2019 kishte marrë dhe licencën e avokatisë pas përfundimit të studimeve në universitetin e Durrësit. Ndërkaq, së bashku me vëllain e tij, Besmirin 32 vjeç, ata kishin edhe një aktivitet të përbashkët ”BV Auto” për tregtim dhe dhënie me qira automjetesh, shërbim karrotreci, si dhe pikë për transferta parash.
