Autoritetet turke kanë deklaruar se janë shumë pranë arrestimit të bosit të kriptomonedhave, Faruk Fatih Ozer.
Operacioni për kapjen e tij ka nisur dhe pritet që të finalizohet brenda 48 orësh. Ozer do të dalë fillimisht para autoriteteve shqiptare dhe më pas do t’i dorëzohet Interpolit, shkruan TRT.
Mësohet se operacioni ka nisur dhe po zhvillohet në 4 zona të ndryshme të Tiranës, aty ku dyshohet se fshihet biznesmeni i kërkuar për mashtrim.
Faruk Fatih Ozer u arratis nga Turqia duke ardhur në Shqipëri në 18 prill duke mbyllur gjithashtu shërbimet e kompanisë së tij “Thodex”, në të cilën kishin investuar më shumë se 350 mijë persona, pjesa më e madhe e tyre, turq.
Mendohet se dëmi i shkaktuar ndaj tyre është 2 miliardë dollarë, ndërsa një pjesë të parave ai i mban me vete në një server të posaçëm në formë kriptomonedhash.
Itenerari i tij në Shqipëri:
Direkt pas ardhjes në Shqipëri, Faruk Fatih Özer u vendos në hotel Mondial pranë Zogut të Zi në Tiranë duke prenotuar tre netë, por doli prej andej natën e dytë, pa bërë as check out dhe më pas është fshehur në shtëpinë e shoferit që e mori në aeroport pranë zonës së “Pazarit të Ri” në Tiranë. Çiftin shqiptar ai e kishte takuar një muaj më parë në Stamboll, ku ata kishin qëndruar në shtëpinë e tij, edhe pse nuk ka asnjë detaj për lidhjen mes tyre.
Sipas burimeve nga policia turke se Faruk Fatih Özer nuk ndenji shumë aty pasi u zbulua nga autoritetet duke u transferuar në një tjetër zonë, pikërisht në zonën e “Myslym Shyrit” në kryeqytet. Por nuk ishte e thënë për turkun e famshëm pasi edhe ky vend ku ai fshihej u zbulua nga policia duke bërë që të transferohet së fundmi në zonën e “21 Dhjetorit” ku edhe ka humbur gjurmë .
