Gjykata e Shkodrës ka caktuar sot masën e sigurisë për katër personat e arrestuar dy ditë më parë, gjatë operacionit të policisë, kryer në lagjet më të rrezikshme të qytetit. Tre nga katër të arrestuarit do të mbeten në qelitë e paraburgimit, ndërsa një i katërt është dërguar në “arrest shtëpie”.
Gjykata e Shkallës së Parë në Shkodër, ka vendosur “arrest me burg” për një periudhë 30 ditore për shtetasit Ilir Bajri, Emrah Plaku dhe Erogen Brajoviç, ndërsa masa e sigurisë “arrest shtëpie” është dhënë për shtetasin Astmer Bilali.
Afati 30 ditor është lënë derisa të vijnë aktet e ekspertimit të prokurorisë, për disa fishekë të gjetur.
Akuzat ndaj tyre janë vetëm për disa fishekë, ndërsa për armët e sekuestruara nuk thuhet se të kujt janë dhe ku janë gjetur.
Avokatët kanë hedhur poshtë akuzat, dhe thonë që s’ka prova, duke kërkuar lirim të menjëhershëm, sepse sipas tyre, prokuroria nuk disponon asnjë provë për implikim të këtyre shtetasve në vepra penale.
