Ish-kreu i KQZ-së, Çlirim Gjata ka folur rreth situatës së sotshme në Shkodër, ku gjyqtarët vendosën masën e sigurisë “arrest shtëpie” për ish-deputetin e PD-së, Bardh Spahia.
I ftuar në studion e emisionit ‘Kjo Javë’ në News 24, Gjata foli me tone të ashpra ndaj gjyqtarëve duke u shprehur se vendimi sotëm është dhënë me urdhër politik të Edi Ramës.
“Bardh Spahia u la në arrest shtëpie. Ç’tregon ai vendim, e shumë të tjerë si ky? Tregon kapjen e gjykatës nga Rama. Është urdhër i Ramës”, u shpreh sekretari për çështjet ligjore në PD.
Gjata ndër të tjera tha se “Dosjet 339 e 184, Prokuroria i ka ditur para nesh po nuk i bënte transparente për të mos dëmtuar Ramën e Rilindjen”, duke i quajtur gjyqtarët si plehrat e shoqërisë.
Deklarata e plotë:
“Bardh Spahia u la në arrest shtëpie. C’tregon ai vendim, e shumë të tjerë si ky? Tregon kapjen e gjykatës nga Rama. Është urdhër i Ramës. Si ka mundësi të arrestohe Spahia që po proteston për votën e lirë e horrat e gansterët që flasin për vjedhje votash, nuk i hyn ferr në këmbë. Dosjet 339 e 184, Prokuroria i ka ditur para nesh po nuk i bënte transparente për të mos dëmtuar Ramën e Rilindjen. Gjyqtarë e prokurorë legena plehrat e shoqërisë që marrin vendim nga Rama, e nuk arrestojnë ta që vjedhin me qindra miliona e si hyn ferr në këmbë. Kjo është për të dalë në rrugë. Është shprehje e vjetër e Amerikës: Kur qeveria trash zullumet kundër popullit, popullit i lind e drejta me cdo mënyrë për të rrëzuar qeverinë.” u shpreh Gjata.
