Policia ka vënë në pranga 2 persona, si ka shoqëruar 67 të tjerë me precedentë penalë. Burimet zyrtare thonë se gjatë kontrolleve të ushtruara nga uniformat blu, janë arrestuar në flagrancë dy shtetas, ku njëri u arrestua për “Armëmbajtje pa leje” dhe tjetri për “Prodhim dhe shitje lëndësh narkotike”. Po kështu janë sekuestuar armë zjarri “pistoletë” me fishekë, tre pako me lëndë të dyshuar narkotike të llojit “Kokainë”, aparate celularë dhe automjete.
“Shoqërohen për verifikim në Komisariatet e Policisë Tiranë 67 shtetas, me precedentë penalë të mëparshëm, si dhe janë verifikuar dhe kontrolluar 67 mjete. Strukturat e Drejtorisë Vendore të Policisë Tiranë, në zbatim të planit të masave për rritjen e parametrave të sigurisë, për parandalimin e ngjarjeve kriminale si dhe për evidentimin dhe goditjen e personave që qarkullojnë me armë zjarri, apo tentojnë të shpërndajnë lëndë narkotike, gjatë orëve të para të mëngjesit të sotëm, kanë ushtruar kontrolle me pika të lëvizshme, në të gjitha rrugët e Tiranës.
Si rezultat i kontrolleve, nga shërbimet e rendit të Komisariatit të Policisë Nr.3, në rrugën “Asim Vokshi”, gjatë kontrollit fizik të ushtruar shtetasit Arsen Caka, 30 vjeç, banues në Tiranë, iu gjetën dhe u sekuestruan në cilësinë e provës materiale, një armë zjarri pistoletë.
Shtetasi Arsen Caka, u arrestua në flagrancë për veprat penale “Prodhimi dhe mbajtja pa leje e armëve luftarake dhe e municionit”, parashikuar nga neni 278 dhe 283 i Kodit Penal.
Gjithashtu në bulevardin “Bajram Curri”, gjatë kontrollit të ushtruar nga Specialistët për Hetimin e Narkotikëve, në mjetin tip “Renaul”, që drejtohej nga shtetasi Gerard Ramaliu, 29 vjeç, banues në Tiranë, u gjet dhe u sekuestrua në cilësinë e provës 3 pako të ambalazhuar me natriban, me lëndë të dyshuar narkotike të llojit “Kokainë”.
Shtetasi Gerard Ramaliu u arrestua në flagrancë për veprën penale “Prodhimi dhe shitja e lëndëve narkotike”, parashikuar nga neni 283 i Kodit Penal.
Janë sekuestruar në total :
– armë zjarri “pistoletë” me fishekë
– 3 pako të ambalazhuara me natriban me lëndë të dyshuar narkotike të llojit “kokainë”
– 2 aparate celular
– automjet tip “Renault”.
Po kështu, të njëjtat burime shtojnë se kontrollet do vijojnë në të gjithë territorin e qarkut Tiranë, për parandalimin dhe goditjen e paligjshmërisë, me qëllim rritjen e parametrave të sigurisë.
