Një 42-vjeçar i dënuar më parë për vrasje në bashkëpunim është arrestuar pasi është kapur me armë zjarri dhe me maska.
Policia tha se në kuadër të operacionit “Përsëritësi” ka përfunduar në pranga Eduart (Edison) Dushku i dënuar më parë për “Vrasje me dashje”, “Shkatërrimi i pronës me eksploziv’’ dhe “Prodhimi dhe mbajtja pa leje e armëve luftarake”.
Ai u kap në rrugën e Elbasanit, ku gjatë kontrollit personal iu gjetën një pistoletë me një krehër me 8 fishekë, një “Kallashnikov”, tetë kapsolla detonatore, dy maska dhe tre celularë.
Gjykata e Shkallës së Parë Tiranë në shtator të vitit 2017 kishte ndryshuar masën e sigurisë për Dushkun nga “Arrest me burg” për veprën penale “Shkatërrimi i pronës me zjarr”, në “Arrest shtëpie”.
42-vjeçari tani do të përballet në gjykatë me veprat penale “Prodhimi dhe shitja e armëve luftarake” dhe “Largimi nga vendi i vuajtjes së dënimit”.
Dushku rezulton me precedentë penale për veprat penale “Dëmtime të tjera me dashje”, “Shkatërrimi i pronës”, “Vrasja me dashje e kryer në bashkëpunim”, “Armëmbajtja pa leje”, “Dhunë në familje” ,”Kallëzim të rremë”, “Shkatërrimi i pronës me zjarr”, “Shkatërrimi i pronës me eksploziv”.
